Паёми Пешво - раҳнамо барои фардои дурахшон.

Ношир: Эмомов И. М. Санаи интишор: Чоршанбе, 26-уми Январи соли 2022

Лозим ба ёдоварист, ки дар Паёми навбатӣ  самтҳои асосии сиёсати дохилию хориҷи мамлакат барои давраҳои муайян пешниҳод гардида, ҳамаи нуктаҳои Паёми илҳомбахши Ҷаноби Олӣ барои ваҳдати комили миллӣ, рушди устувори иқтисодӣ ва зиндагии шоистаи мардум мусоидат менамоянд. Паёми имсолаи  Пешвои муаззами миллат муҳтарам Эмомалӣ Раҳмон махсусан ба соҳаи кишоварзӣ диққати махсус зоҳир намуда,  як қатор  тағйироту дигаргуниҳо ба амал оварда шуд.

Зимни Паёми навбатӣ Сарвари давлат зикр намуданд: Ҳукумати мамлакат дар солҳои соҳибистиқлолӣ, дар баробари амалисозии ислоҳоти соҳаи кишоварзӣ, ҷиҳати дастгириву пешрафти бахшҳои мухталифи соҳа як қатор барномаҳоро қабул ва амалӣ намуд. Барои рушди соҳа дар ин давра аз ҳамаи манбаъҳои маблағгузории давлатӣ беш аз 18 миллиард сомонӣ, аз ҷумла дар доираи татбиқи 29 лоиҳаи сармоягузории давлатӣ 9,4 миллиард сомонӣ равона карда шуд.

Ҳамчунин дар Паёми навбатӣ ёдовар гардид, ки барои соҳа имтиёзҳои зиёди андозиву гумрукӣ муқаррар карда шуданд ва дар натиҷа ҳама бахшҳои соҳа ба пешравиҳои назаррас ноил гардиданд. Масалан, дар давоми 20 сол шумораи корхонаҳои парандапарварӣ аз 21 ба 200 расонида шуда, истеҳсоли гӯшти паранда 9 баробар зиёд гардид. Воридоти гӯшти паранда аз 65 ҳазор тонна ба маблағи 50 миллион доллар дар соли 2014 то 3 ҳазор тонна ба маблағи 9 миллион доллар дар соли 2021 кам гардид, яъне аз рӯи ҳаҷм беш аз 21 баробар коҳиш ёфт.

Нуктаи муҳими дигари Паёми Президенти мамлакат  аз он иборат буд, ки бо мақсади дастгирӣ дар шароити тағйирёбии иқлим ва офатҳои табиӣ, бахусус, хушксолӣ ва обхезӣ, паҳншавии бемории КОВИД - 19 дар ду соли охир ва пешгирӣ кардани таъсири манфии онҳо кишоварзони мамлакат дар соли 2021 аз пардохти андоз аз истеҳсолкунандагони маҳсулоти кишоварзӣ, яъне андози ягона озод карда шуданд. Иқдоми мазкур боиси 6 фоиз афзоиш ёфтани истеҳсоли маҳсулоти кишоварзӣ дар соли ҷорӣ нисбат ба соли қаблӣ гардид. Дар натиҷа фаровонии бозори истеъмолии кишвар бо молу маҳсулоти асосии ниёзи мардум таъмин карда шуд. То замони истиқлолият талаботи аҳолӣ ба гӯшт ва картошка асосан аз ҳисоби воридот таъмин мегардид. Сарвари давлат ҳамзамон зимни баромади хеш хотирнишон кард, ки  солҳои охир ва хусусан, ду соли охир дар кишвари мо ва бисёр мамлакатҳои дунё хушксолӣ ва камборишӣ идома дорад. Тибқи маълумоти расонаҳо ва Созмони Милали Муттаҳид имрӯзҳо дар даҳҳо кишвари сайёра гуруснагӣ идома дорад. Дар чунин шароит мо бояд ба истифодаи захираву имкониятҳои мавҷуда, пеш аз ҳама замин ва об, мунтазам зиёд кардани ҳаҷми истеҳсоли маҳсулоти ғизоӣ ва дар баробари ин, ба масъалаи сарфаю сариштакорӣ ниҳоят ҷиддӣ муносибат кунем.  Ҳамзамон бо ин, сохтору мақомоти дахлдорро зарур аст, ки стратегияву барномаҳои соҳавиро пурра татбиқ намуда, доир ба рушди тухмипарварӣ, баланд бардоштани ҳосилнокии зироатҳо, зиёд кардани ҳаҷми истеҳсоли маҳсулоти кишоварзӣ, таъмин намудани рушди саноати коркард ва хӯрокворӣ, инчунин, тақвияти иқтидори содиротии кишвар тадбирҳои саривақтӣ андешанд.

Аз ин рӯ, мо мутахассисиони  соҳаро  зарур аст, ки дар партави дастуру супоришҳои Пешвои муаззами миллат муҳтарам Эмомалӣ Раҳмон  аз захираву имкониятҳои мавҷуда самаранок истифода бурда, пайи амалӣ гаштани корҳои муносиби ҷамъиятӣ ва беҳбуд намудани зиндагии шоистаи мардум ҳиссаи арзандаи хешро гузорем.

Иззатулло ЭМОМОВ, мудири шуъбаи иттилоот, машварат ва татбиқи дастовардҳои Институти хокшиносӣ  ва агрохимия.

Тоҷикӣ

Меню: